15-vjeçari jep dëshminë e tij për vrasjen në Shkodër: Ibrahim Lici qëlloi disa herë mbi të

SHKODËR– Ergys Malja, 15-vjeçari i arrestuar për vrasjen e Endri Mustafës ka dhënë dëshminë e tij për ngjarjen e ndodhur, ku akuzon si autor të vrasjes Ibrahim Licin.

Malja ka treguar bisedën e tij të fundit me viktimën dhe momentet e fundit të jetës së tij. Ai tha se me Mustafën kishin biseduar për punë hashashi dhe ai do e ndihmonte për ta çuar në shtëpi.

Pasi shkuan te Livadhi, i mituri deklaroi se aty ishte prezent Ibrahim Lici, i cili qëlloi disa herë mbi viktimën dhe më pas u largua me motorr.

“Më 15 maj gjatë drekës çova në banesën e tij një qengj të blerë në Postribë pasi ma kishte kërkuar Endri, i cili fillimisht më dha 40 mijë lekë të vjetra dhe më pas, nga ora 19:00 edhe 70 mijë të tjera. Atë ditë biseduam për punë hashashi, pasi i kisha thënë Endrit se kisha mbjellë rreth 150 rrënjë hashash 3-mujorsh në livadhe me dy shokë dhe doja t’i merrja. Endri më tha se do më ndihmonte ai që ta merrnim e ta çonim tek shtëpia ime për ta tharë.

Pas kësaj bisede ne u nisëm nga banesa jonë rreth orës 21:30 ose 22:00. Unë i çova në Instagram një foto kali, si kod që Endri të dilte jashtë për t’u nisur për në Livadhe. Pasi u takuam pas banesës së Endrit, u nisëm më këmbë drejt livadheve, duke kaluar rrugën e Bypass-it dhe pasi shkuam diku afër livadhit të Endri Mustafës u kthyem djathtas për të dalë në një vend tjetër të quajtur “Gropat e ekskavatorit” ky kisha mbjellë hashashin.

Aty na doli para Ibrahim Lici me armë në dorë dhe qëlloi direkt mbi Endrin, i cili u shtri në tokë dhe i tha ‘aman mos më vrit pash Zotin se kam fëmijë’. Ai e qëlloi përsëri, madje edhe në fytyrë duke i thënë ‘qofsh i xhenetit’. Pas kësaj Ibrahim Lici u largua me motor nga vendi i ngjarjes, unë ika me vrap për në shtëpia andej nga erdhëm”, ka deklaruar minoreni.