Shkak situata e tensionuar në Kosovë, Rama dhe Vuçiç nuk flasin në konferencën e përvjetorit të “Ballkanit të Hapur”

NOVI SAD– Kryeministri Edi Rama dhe Presidenti i Serbisë, Aleksandar Vuçiç, nuk do të flasin ditën e nesërme në konferencën e përvjetorit të “Ballkanit të Hapur”.

Konferenca po mbahet sot dhe nesër në Novi Sad. Kryeministrja e Serbisë, Ana Brnabić, pritet të flasë me të gjithë pjesëmarrësit e forumit ndërsa kryeministri i Maqedonisë së Veriut, Zoran Zaev, do të bashkohet përmes lidhjes video.

Si fillim ishte planifikuar që pasi të kishin mbaruar fjalën e tyre, Vuçiç, Rama dhe Zaev do t’i drejtoheshin shtypit, por ky ndryshim mendohet të ketë lidhje me tensionet aktuale në Kosovë.

Organizatorët e saj janë Fondi për Çështjet Evropiane të Vojvodinës, Fondacioni Konrad Adenauer dhe Forumi Rajonal i Liderëve të Rinj.

Si fillim nisma u krijua me emrin “Shengeni i Vogël” dhe konsistonte në bashkëpunimin ekonomik të Ballkanit. Takimi i parë u mbajt në vitin 2019 në Novi Sad në tetor, ndërsa kohët e fundit ndryshoi emrin në Ballkan të Hapur.

/Zoguu.al/